კონკურსი
კონკურსის შესახებ
2022 წლის სექტემბერში ქალაქ ბათუმში, საზაფხულო თეატრისა და ი. ჭავჭავაძის სახელობის ბათუმის სახელმწიფო დრამატული თეატრის სცენებზე დაფუძნდა შავი ზღვის საერთაშორისო ფესტივალი „ბათუმის რაფსოდია”. მის ფარგლებში კი გაიხსნა საერთაშორისო საოპერო კონკურსი – “ოპერის ოქროს ხმა”, რომელმაც გამოავლინა ახალგაზრდა, ნიჭიერი მომღერლები, უმასპინძლა 100-მდე ვოკალისტს მთელი მსოფლიოდან. კონკურსანტები შეფასებულ იყვნენ საერთაშორისო დონის ჟიურის წევრთა მიერ. კომისიის შემადგენლობაში შევიდნენ და ერთი კვირის განმავლობაში აქტიურად მუშაობდნენ მსოფლიო საოპერო სცენის ვარსკვლავები, მსოფლიო საოპერო თეატრების ხელმძღვანელები, საოპერო სფეროს აგენტები და ა.შ.
კონკურსი მიზნად ისახავს განსაკუთრებული მონაცემებითა და ნიჭით დაჯილდოებულ ახალგაზრდა ვოკალისტთა გამოვლენას, მათი სამომავლო პროფესიულ დაოსტატების, კარიერული ზრდისა და მსოფლიოს სხვადასხვა, დიდ საოპერო თეატრსა თუ სასწავლებელში მოღვაწეობის ხელშეწყობას.
საერთაშორისო საოპერო კონკურსში „ოპერის ოქროს ხმა” მონაწილეობის მიღება შეუძლიათ მსოფლიოს ყველა ეროვნებისა და აღმსარებლობის ახალგაზრდა მომღერლებს 18-35 წლამდე.
ფესტივალსა და კონკურსში მონაწილეობის მსურველები საჭირო ინფორმაციასა და რეგისტრაციისათვის დოკუმენტაციის შესახებ დეტალებს შეუძლიათ გაეცნონ ფესტივალის ოფიციალურ ვებ-გვერდსა და Facebook – გვერდზე (#BatumianRhapsody #Opera’sGoldenVoice).
ფესტივალ-კონკურსის ფარგლებში მონაწილეებს საშუალება აქვთ რეპეტიციები გაიარონ გამოცდილ პიანისტ-კონცერტმაისტერებთან, შეხვდნენ და იმუშაონ ცნობილ მომღერლებთან, დაესწრონ ცნობილი მომღერლებისა და ხელოვანების საჯარო ლექციებსა და მასტერკლასებს და კონკურსის მესამე ტურში გასვლის შემთხვევაში, იმუშაონ ორკესტრთან ერთად.
საერთაშორისო საოპერო კონკურსი „ოპერის ოქროს ხმა” სამი ტურისგან შედგება. 2022 წლიდან ღონისძიების ძირითადი ლოკაციებია ბათუმის საზაფხულო თეატრი, ილია ჭავჭავაძის სახელობის ბათუმის სახელმწიფო დრამატული თეატრი და ბათუმის ზაქარია ფალიაშვილის სახელობის სამუსიკო სკოლა. პროექტის ფარგლებში საჯარო ღონისძიებებზე, მათ შორის ტურებზე, მოსმენებზე, მასტერკლასებსა და ლექციებზე დასწრება თავისუფალია.
2022 წლის 24 სექტემბრის ფესტივალ-კონკურსის საზეიმო გახსნაზე 100-მდე კონკურსანტი წარსდგა პუბლიკის წინაშე და კენჭისყრის საფუძველზე, განისაზღვრა მათი საკონკურსო ტურებში მონაწილეობის რიგი, გახსნის საზეიმო ცერემონიის ფარგლებში აუდიტორიას მიესალმა ფესტივალის დამფუძნებელი – სოპრანო თამარ ივერი, წარადგინა ჟიურის წევრები და საღამოს დასკვნით ეტაპზე ცნობილი მომღერლების მიერ შესრულდა მსოფლიო მუსიკალური შედევრები.
დებულების თანხმად, კონკურსანტები I-სა და II ტურში ფორტეპიანოს თანხლებით ასრულებენ მათ სავალდებულო პროგრამას (2-2 განსხვავებული სტილის არიები). ფინალში გასული მონაწილეები კი სიმფონიური ორკესტრის თანხლებით იმეორებენ ერთ არიას წინა ტურებიდან და ასრულებენ ერთ ახალ არიას.
გულშემატკივრებსა და დაინტერესებულ პირებს მსოფლიოს ყოველი კუთხიდან საშუალება აქვთ თვალყური ადევნონ კონკურსის სიახლეებსა და მიმდინარე პროცესებს სხვადასხვა პლატფორმებზე: Facebook, TikTok და ა.შ. ასევე, გაეცნონ პროექტის სპონსორებს და მათი კომპანიების საქმიანობას.
2022 წელს კონკურსის „ოპერის ოქროს ხმა“ ლაურეატების დაჯილდოება და საზეიმო გალა-კონცერტი პირდაპირ ეთერში გაშუქდა ფესტივალ-კონკურსის ოფიციალურ გვერდზე.
კონკურსის დამფუძნებელი და პრეზიდენტი: ჯუზეპე ვერდის და ვოლფგანგ ამადეუს მოცარტის ვოკალისტთა საერთაშორისო კონკურსების ლაურეატი, ვენის შტაატსოპერის „ებერჰარდ ვეხტერის” საპატიო მედლის მფლობელი, ავსტრალიის ხელოვნების უმაღლესი ჯილდო „ჰელფმან ევარდსის” ნომინანტი, სოპრანო თამარ ივერი